Kapamilya, Kapuso sanib-pwersa sa ‘GVBoys’

Mapapanood sa “GVBoys” sina (nakaupo mula kaliwa) Dave Bornea, Jerome Ponce, (nakatayo mula kaliwa) Nikko Natividad, Carmi Martin, Elsa Droga, at Wilma Doesn’t./CONTRIBUTED PHOTO

GOOD vibes and hatid ng mga “Kapamilya” at “Kapuso” ngayong panahon ng pandemya sa bagong seryeng mapapanood sa YouTube.

Bibida sina Jerome Ponce at Nikko Natividad mula ABS-CBN, at Dave Bornea mula GMA, sa digital comedy series na “GVBoys: Pangmalakasang Good Vibes” sa direksyon ni Don Cuaresma.

Sinabi ni Cuaresma na nabuo ang “GVBoys” upang ipadama sa bagong henerasyon ang diwa ng mga sitcom noong dekada ’90 tulad ng “Okidokidok,” “Home Along da Riles,” “Chika Chika Chicks,” “Abangan ang Susunod na Kabanata,” at “Palibhasa Lalake.”

Si Nikko Natividad si ‘Daks.’/CONTRIBUTED PHOTO

“We’re bringing that inspiration here, for the new generation to enjoy,” ani Cuaresma sa isang virtual press conference kamakailan.

Maihahalintulad ang “GVBoys” sa “Palibhasa Lalake,” na may tatlong bidang lalaking tatanggap sa baton mula kina Richard Gomez, Joey Marquez, at John Estrada—sina Ponce, Natividad, at Bornea.

At kung ang “Palibhasa” may “Tita Minerva” na binigyang-buhay ng beteranang aktres na si Gloria Romero, nasa “GVBoys” naman ang Korean-Filipino na si “Aling Pearly” na ginagampanan ng comedy icon na si Carmi Martin.

Si Dave Bornea si ‘Zeus.’/CONTRIBUTED PHOTO

Ngunit nilinaw ni Cuaresma na hindi pagpapatuloy ng “Palibhasa” ang “GVBoys.”

Magkatulad lang ang dalawa sa pagkakaroon ng boarding house na may tatlong lalaking umuupa. At kung si Minerva ang kasera sa “Palibhasa,” si Pearly naman ang sa “GVBoys.”

“The rest [of the show’s elements] we came up with all ourselves,” ibinahagi ni Cuaresma.

Si Jerome Ponce si ‘Jawo.’/CONTRIBUTED PHOTO

Sa serye, ginagampanan ni Ponce and papel ni “Jawo” na nangangarap maging artista, habang si Natividad naman ang pilyong si “Daks.” Si Bornea ang misteryosong si “Zeus.”

Iginiit ni Cuaresma na kahit nagbibigay-pugay ang “GVBoys” sa mga sitcom noong dekada ’90, naaangkop pa rin ito sa kasalukuyang panahon.

Isinaalang-alang sa pagsusulat ang virtual na medium, at sinundutan ng mga elemento ng pagba-viral na pumupukaw sa atensyon ng kabataang manonood sa ngayon.

Nagsimula na ang “GVBoys” nitong Hulyo 10, 7 p.m. sa PureGold YouTube channel.

The post Kapamilya, Kapuso sanib-pwersa sa ‘GVBoys’ appeared first on Bandera.