Boobay napaiyak nang makita ang litrato ng ex-dyowa sa Bora: Ang sakit pala kapag sinasabing ‘past na ito’

NAPAIYAK ang Kapuso comedian na si Boobay nang mapag-usapan ang nakahiwalay niyang ex-boyfriend na si Kent Resquir.

Hindi napigilan ng komedyante at TV host ang maging emosyonal nang mag-guest sa morning show ng GMA 7 na “Mars Pa More” nang makita ang litrato ng dating karelasyon.

Ang nasabing photo ay kuha noong magbakasyon sila ni Kent sa Boracay kasama ang ilan sa malalapit nilang mga kaibigan.

Nito lamang nakaraang linggo nang aminin ni Boobay na hiwalay na sila ng kanyang non-showbiz boyfriend matapos ang siyam na taon nilang relasyon. Hindi na siya nagdetalye kung bakit bigla na lang silang nag-break.

Sa isang segment ng programa, sinabi ng host na si Camille Prats kung maaari nilang pag-usapan ang nasabing Boracay photo kung saan makikitang enjoy na enjoy sila sa kanilang pagbabakasyon.

“Teka, o sige pag-usapan muna natin at saka past na ito, Mars!” ani Camille kay Boobay.

Ngunit bago pa nga makapagsalita ang host ng “The Boobay And Tekla Show” ay napaiyak na siya. Pinunasan muna niya ang kanyang mga mata bago sinagot si Camille.

“Oo past na! Ang sakit pala na sinasabing ‘Past na ito ‘no?’ Tapos dinidikdik mo pa. Parang pina-realize mo sa akin na past na nga pala,” ang birong tugon ng stand-up comedian.

“Kasi parang pangalawang beses pa lang niyang umuuwi from Australia. So February ‘yan, Valentine’s last year (2020) bago pa mag-lockdown o bawal ang lumipad,” kuwento pa ni Boobay.

“Sabi ko, maganda ‘yata maging mas memorable ‘yung uwi niya rito para siyempre, I’m sure nabo-bore siya roon sa Australia. Something, alam mo ‘yun, elegant na bakasyon,” aniya pa.

Bigla namang humirit ang kaibigang komedyante ni Boobay na si Pepita na guest din sa show, “Ang usapan ambag-ambagan pero ikaw lahat ang nagbayad, kaya very generous.”

“Worth it naman ‘yung nangyari kasi ‘di ba nag-enjoy ‘yung mga friends ko,” sey ni Boobay.

Singit naman ni Pepita, “Naisip mo ba na itong tawa na ito ay hindi na pala mauulit?” Napangiti lamang si Boobay ngunit makikita sa kanyang mukha na affected pa rin siya sa break-up nila ng ex-dyowa.

The post Boobay napaiyak nang makita ang litrato ng ex-dyowa sa Bora: Ang sakit pala kapag sinasabing ‘past na ito’ appeared first on Bandera.